வாழ்தல்

இத்தனை ஆண்டுகாலமாக
வாழ்ந்துக்கொண்டிருக்கிறேன்.
ஆனால் -
இன்னும் வாழத்தான்
பழகவில்லை.

 

ஏதுமறியாத நான்

பார்வையற்றவனின்

குரலைப் போல

என்னால் பாட இயலாது.

எதுவுமற்று

தெருவில் இருக்கிறவன் போல

ஒற்றை சாக்கட்டியால் கடவுளை

சிருஷ்டிக்கிற விரல் என்னிடம் இல்லை.

புல்லாங்குழல் விற்பன்னனின்

அமுதகானமும் என்னிடம் கிடையாது.

ஆனாலும் அவர்களைவிட

நான் பெரியவன் என

எண்ணுகிற மனம் மட்டும்

என்னிடம் உண்டு.  

 

 

காதல் கவிஞன்

மொழி வசப்பட்டுவிட்டது.

காதல்தான் படுத்துகிறது.

 

 

அனுமானம்

 

அந்திப் பொழுதில்

அலுவல் முடிந்து

வீட்டுக்குச் சென்றுக்கொண்டிருந்தேன்.

ஒரு மர நிழலில்

அவள் அவனிடம் ஏதோ சொல்லி

அழுதுக்கொண்டிருந்தாள்.

என் மனதில்

ஏதேதோக் கதைகள்

கிளைக்கத் தொடங்கின -

அவர்களுக்கு மட்டும்

தெரிந்த அந்த

உண்மைக்கதையைத் தவிர!

 

 

 

 

காதலிக்கப்படாதவன்

என்னை நீ
காதலிக்க வேண்டாம் .
அது அவசியமுமன்று.
ஆனால் -
என்னைக் கடக்கும் போது
சக மனிதனை கடக்கும்
பாவனையுடனாவது நடந்து செல்.