நினைவின் மிச்சம்

எல்லாம் கடந்து 

வந்த பின்பும் 

இன்னும் ஏதோவொன்று 

கடக்க இருப்பதை போல 

எல்லாம் மறந்துவிட்ட  

பின்பும் இன்னும் 

ஏதோவொரு நினைவு 

மிச்சமிருக்கிறது 

மறப்பதற்கென்று.

தற்கொலை

 

மகன்களின் 

தற்கொலைகள் 

சமயங்களில் அப்பாக்களால் 

நிகழ்த்தப்படும் 

மறைமுக படுகொலைகள்...

அன்பின் பாசாங்கு

இறந்தவரின் 

உடல் முன் 

அரங்கேறும் பெரும்பாலான 

நிகழ்வுகள் யாவும் 

முகத்திரைப் போர்த்திய 

அன்பின் பாசாங்குகளே!!!

வாழ்வின் ரகசிய உடன்படிக்கை

வாழப் பிடிக்கவில்லை 

எனினும் வாழ்தல் 

அவசியமாகிறது -

யாரோ அல்லது ஏதோ 

ஒன்றின் பொருட்டு.

மரணிக்கும் தருவாயில் 

எல்லாம் முழுமையடையும் 

பட்சத்தில் இச்சமரசத்திற்கு 

உடன்படுகிறேன் மிக 

ரகசியமாக...

நினைவின் குமிழிகள்

மனதின் ஏதோவொரு 

கொதிநிலையில் 

உடைந்து அடங்குகின்றன 

நினைவுக் குமிழிகள்.

நட்பின் அடர்த்தி

அணுகுவதற்கோ, விலகுவதற்கோ 

எவ்வித சிரமமுமின்றி ஒரே 

இடத்தில் சிலையென 

நிலைக் கொண்டிருக்கிறேன்.

உங்களின் முன் நகர்வோ 

பின் நகர்வோதான் நம் 

உறவின் அடர்த்தியை 

நிர்ணயிக்கிறது காலங்காலமாக.

காதல் > புரிதல்

உன் புரிதலுக்குள் 

அடங்காது என் 

காதல்.

தேடலின் சாபம்

தேடல் ஒரு மனிதனை 

என்ன செய்யும்?

என்னவெல்லாமோ செய்யும் -

அவனை ஒன்றும் ஆகவிடாமல் 

செய்வதையும் சேர்த்து.

Pencil கிழவன்

ஏதோ ஒன்றை வரைய 

பென்சிலைத் தேடிக் 

கொண்டிருக்கும் அச்சிறுவனிடம் 

கிடைக்கிறது அவன் பிஞ்சுக் 

கைகளுக்குள்கூட அகப்படாத 

சிறு பென்சில்.

தன்னால் கூர்தீட்டிட முடியாத 

அப்பென்சிலைத் தன் தாத்தாவிடம் 

கூர்த்தீட்டிட கேட்கிறான்.

உடலும் சில நினைவுகளும் மட்டுமேயுள்ள 

இரு கிழவர்களும் ஒருவரை ஒருவர் 

பார்த்துக் கொள்கின்றனர் 

மிக அமைதியாக....

திசைகள்

பிரிந்தே கிடக்கும் 

எதிரெதிர் துருவங்களான 

கிழக்கையும் மேற்கையும் 

மிக அமைதியாக 

கைகோர்த்து பிணைத்தே 

வைத்திருக்கின்றன 

வடக்கும் தெற்கும் 

காலங்காலமாக...

என்னை வாசிக்கும் புத்தகங்கள்

அலுவல் நிமித்தமாக
அலைந்து திரியும் என்னை  -
பல நாட்களாய்
சட்டை செய்யப்படாத
எனது அலமாரிப் பபுத்தகங்கள்
வாசிக்கின்றன
மிக உன்னிப்பாக.

மூன்றாம் உலகப்போர்

பிரபஞ்ச அமைதி...
மூன்றாம் உலகப் போரில்
கடைசியாய் வெடித்த அணுகுண்டு.

இயலாமை

என் 

இயலாமை, ஆற்றாமையின் மீது 

கல்லெறியாதீர்கள்.

எளியன மீது

நீங்கள் கட்டவிழ்க்கும் வன்முறை

ஒருபோதும் உங்களை

பெருமைக் கொள்ள வைக்கப்போவதில்லை. 

கருத்தரிக்கும் காதல் மேகம்

நீயும் நானும் 

ஒன்றாக கரம் சேர்த்து 

தாங்கிய மழைத்துளிகளின் 

பிராத்தனையால் 

கருத்தரித்தது 

மற்றுமொரு மேகம்!!!

கனாக்காதலி

 

தலைக் கோதி
உறங்கச் சொல்கிறாய்.
ஆனால்-
நான் உறங்கும்
முன்னே
என் கனவில்
நுழைந்துவிடுகிறாய்.

 

நாத்திகம் VS பகுத்தறிவு

நாத்திகம்தான் பகுத்தறிவு என

எண்ணிக் கொண்டிருக்கும் மூடர்

ஒருபோதும் அறியார்

கடவுள் உண்டென்றும்;

இல்லையென்றும்.

பூவிதழ்

உன் இதழ்களின் மீது 

வட்டமிடும் சிறு 

வண்ணத்துப்பூச்சி 

என் இதழ்.

காதல் பெருமழை

நீ குடை
கொண்டுவருவாய் என நானும்
நான் குடை
கொண்டுவருவேன் என நீயும்
இறுதி வரையில்
நனைந்தே திளைக்கிறோம்
இப்பெருமழையில்.

முத்தம் - வெட்கம்

முத்தம் நான்.

வெட்கம் நீ!!

காத்திருக்கும் கொலு பொம்மைகள்

நீ கொலு 

பார்க்க வரும் 

அழகைக் காணவே 

வீட்டில் அடுக்கப்பட்டிருக்கின்றன 

பொம்மைகள்.