நதியில் விழுந்த இலை

Wednesday, December 25, 2013

நிலவு மட்டுமே

அறிந்த ரகசியம் -

அதன் முழுமை என்பது

பௌர்ணமி மட்டுமன்று

அமாவாசையும்தான் என்பதை.

உன்னிடம்

சேர்ப்பிக்க முடியாத

கடிதங்கள் -

எப்போதுமே

உடையாத

ஞாபகக் குமிழிகள்.

என்னை ஏன் காதலிக்கிறாய்

எனக் கேட்கிறாய்.

உன்னைக் காதலிக்காமல்

இருந்தால்தான் அதிசயம் என்கிறேன்.

என் தாத்தா ஒரு முதலாளி.

என் அப்பா ஒரு கடை நிலை ஊழியன்.

என்னை அடிமையாக்க முயற்சி செய்கிறார்கள்.

என் மகன் அடிமையாக்கப்படுவான்.

என் பேரன் அடிமையாகவே பிறப்பான்.

பேச ஆரம்பித்த

குழந்தை

இன்னும் சைகை கொண்டு

விளக்குவது போலதான்

காதல்சொன்ன பின்பும்

உன்னை நான் பின்தொடர்தலும்.