கடவுளா? மிருகமா?

என்னில் காணும் தெய்வத்தைக்
கண்டு ஆச்சரியம் கொள்வதாக
சொல்கிறாய்.
ஆனால்-
அது மிருகத்தின் மாறுவேடம்
என்பதை உன்னிடம்
சொல்ல நினைப்பது
என்னுள்ளிருக்கும்
கடவுளா? மிருகமா?

நீ+நான் = காதல்

என் கோடையின்
முதல் மழைத்துளி நீ!
உன் இலையுதிரின்
கடைசி இலை நான்!

ஊரோடு தங்கிவிட்ட சிறுதெய்வங்கள்

பெருந்தெய்வங்களைப் போல 

அத்தனை சாமர்த்தியம் போதவில்லை 

சிறுதெய்வங்களுக்கு -

தன் மக்களோடு 

பெருநகரங்களிலும், அயல்நாடுகளிலும் 

கிளைப் பரப்ப.

 

 

ஆண்களின் வாழ்க்கை

யாரோ...தோழி...காதலி...மனைவி
யாரோ...காதலி...தோழி...யாரோ
யாரோ...யாரோ...யாரோ...யாரோ
அவ்வளவுதான் ஆண்களின் வாழ்க்கை.
 

 

குடும்பத் தலைவி

தினமும் தன் உணவைத் தானே
சமைத்து உண்ணும்
மத்திம வயது பிரமச்சாரி உணர்வான்
அலுவலகம் சென்று வந்து
தன் குடும்பத்துக்கு
முகம் சுளிக்காமல்
சமைத்துப் போடும்
குடும்பத் தலைவியின்
பேரன்பை; பெருமூச்சை.