நதியில் விழுந்த இலை

Monday, February 3, 2014

உன்னிடம் கோபம் கொள்ள

எத்தனை நியாயமான காரணங்கள் இருந்தும்

என்னால் அத்தனை சுலபமாக

கோபிக்க முடியவில்லை.

நினைத்துக் கொள்கிறேன் -

உனக்கு அனுப்பப்படாத

என் கடிதங்களைப் போலதான்

என்னை நீ

அழைக்காததும், சந்திக்காததும்!

வனத்தில் என்னைத்

தொலைத்த போதுதான்

புரிந்தது

வனத்தை தொலைத்த

மிருகத்தின் வாழ்வை.

காதலென்பது

பூமியின் மீது விழும்

சொர்க்கத்தின் நிழல்.

கடவுளும் சாத்தானும்

என்னுள் மூர்க்கமாக

சண்டையிட்டுக் கொண்டிருக்கிறார்கள்.

எவர் வென்றாலும்

நான் சரணடைவதைத் தவிர

வேறு வழியில்லை.

காதலென்பது சிறையெனில்

அதில் நானொரு

ஆயுள் கைதி!